Ur 6vet divyezhek e St Se Landerne ?

Anv ‘zo gant skolaj Sant Sebastian Landerne digeriñ ur rouedad divyezhek en distro-skol a zeu.
Degouezhet omp e derou Miz Mae, skolajidi a zo enskrivet
met MANKOUT A RA DAOU C’HOAZH da zigeriñ an hentenn.
Ar pennadig-mañ ‘zo skrivet d’ho kelaouiñ a-benn ma vo graet un tamm bruderezh.
Daou n’eo ket ouzhpenn deomp evit ober d’ar brezhoneg mont war-raok e Landerne !
Daoust hag eñ e vo kavet an daou skoliad-se a-raok dibenn ar bloavezh-skol ?
Marteze e vint kavet a-drugarez deoc’h.

Trugarez deoc’h da brederiañ un tammig da welout ar pezh a c’hellit ober da ziskoachañ daou skolajiad nemetken…

 

 

Erlec’hiadur ar boblañs er C’hwec’hkogn

Ar gartenn-mañ a gomz gwelloc’h eget ur brezegenn hir.
E rannbarzh Breizh e kaver sifr izelañ ar C’hwec’hkogn, met n’eo ket kontet Liger Atlantel er sifr-se, mar befe kontet e vefe ar sifroù en tu all da zek marteze.
Un dra all a zo da verzout en emdroadur etre 2005 ha 2014 : (8,11/3,47)= + 234 %, ar pezh a verk ez eo e Breizh B4 ez a ar buanañ ar c’hresk er bloavezhioù-mañ e Frañs.

Ouzhpenn ar ‘melting pot” abaoe an Dispac’h  Gall hag a zo aet kalz war washaat goude ar c’hentañ brezel bed, hag a zo o vuanaat bepred abaoe oc’h ober d’ar Vretoned kuitaat o bro da labourat e lec’h all e teu d’en em staliañ en hor bro kalz a C’hallaoued a orin eta, ha neuze ez eus ivez ouzhpenn 8% a dud aralleuropat.
Ma seller ouzh ar rannbarzhioù all e c’heller rakwelout e vo daougementet ar sifr-mañ a-raok 10 vloaz, sellit ouzh an emdroadur er PDL da skouer a zo aet eus 8,24 % da 14,8 %.

Penaos ‘ta e c’hellje Breizh mirout he yezh gant an daou c’hour-lanv-se ?

Ar pezh a zo nevez ouzhpenn eo n’eo ket kristen an darn vras eus an dud-se.
Nec’hus eo evit ar c’henvevañ er gevredigezh, pa n’eo ket mui talvoudoù ar relijion gristen boutin etre an dud er gevredigezh, ar pezh a oa e diazez ar peoc’h hag ar c’henvevañ er gevredigezh, betek nevez ‘zo e Breizh, ha n’eo ket gouest an tebet “talvoudoù ar Republik” da c’hoari d’e dro ar roll-se abalamour m’he deus ar republik-se un termenadur faos eus an Den :

– klask a ra diskar ar relijion gristen (1789, 1881, 1905…) ;

– ne zouj ket ouzh ar Vuhez (lezenn Veil-Giscard 1973)
– ne zouj ket ouzh ar familh (an torr-dimeziñ, lezenn Taubira…)
– ar frankiz revel ‘pep hini zo libr gant e damm kig’ (lezenn an hilastalerezh, ar bilulenn, ar sioc’hananadurioù)

– (…) (…)
Hag an Emsav, dilezet gantañ ar vroadelouriezh kristen evit ur gleizelouriezh nay, siwazh a zo evel kalemarc’het gant ar gleizelourien c’hall, a zo, an holl anezho, Jakobined e-keñver hor broad (sellout ouzh afer Naoned e Breizh, pe an adaozadur rannbarzhel).

Emañ ar gwir gant Roparz Hemon : Poent eo distagañ hor c’harr diouzh hini Bro-C’hall. Hogen n’eo ket gallus er mare-mañ. Pezh a chom gwir d’am soñj eo e rank ar brezhoneg servijañ da venveg evit derc’hel d’hon identelezh brezhon-kristen el ledenez-mañ.

 

T. G.

 

Kentelioù Katekiz evit ar re vihan Kentel 0 da 6

Unan eus kudennoù brasañ an Iliz abaoe Vatikan II eo diskaradur naet ar c’hatekiz.
Anat eo e rank ar gerent pediñ gant o bugale bemdez kerkent ha ganet, hogen ivez kelenn anezho abred-tre hep gortoz an nebeut katekiz a c’hellint tapout e stern ar parrezioù pa vezint degouezhet en ‘oad a skiant’, seizh vloaz : re ziwezhat e vo, diheñchet e vezint buan gant an endro andoueat ma’z eo soubet an dud ennañ e Frañs hiviziken.

Petra da ober ? Amañ-kevret e kavor 6 kentel gentañ ul levr katekiz en deus diskouezet e berzhioù mat e galleg dindan an anvad “La nouvelle Miche de pain” bet adembannet meur a wech abaoe 1934 (an embannadur diwezhañ a gav gwerzh bepred, un embannadur e teir levrenn a zo nevez deuet er-maez e ti Elor e 2005).
Ur c’helennadur asur-tre eo, ur bedagogiezh eeun-kenañ. Savet eo evit an oad tenerañ, adalek 4 bloaz. Ar gerent a gavo aes ober gant ar pajennoù-mañ gant o bugale.
Evit abegoù a wirioù hon eus dibabet skeudennoù embannadur 1973 avat, ha kempennet un tamm an destenn hec’h-unan.

Da c’hortoz ar c’hamp katekiz da zont en eskopti Gwened (skrivañ deomp ma ‘z oc’h dedennet da zont gant ho pugale) e c’hell kerent Emglev An Tiegezhioù, hag ar re a garo, ober o mad eus ar pajennoù-mañ.
Ul levr 250 pajennad e vo pa vo echu. Laouen e vefemp o c’houzout pet skouerenn a vo mat moulañ rak gwerzhet fall-tre eo bet “Diverradur Katekiz an Iliz katolik” : digeriñ a reomp eta ur roll rakprenerien skrivañ deomp. Klask a raimp chom hep lakaat ur priz re uhel evelkent.

Katekiz bugale betek kentel 6.pdf

Ur Raktres “Bod pe/ha Boued” e brezhoneg


Gant “Ar Redadeg 2016” e vo sikouret ur raktres da sikour ar vrezhonegerien da gaout liammoù sokial kenetrezo :

Tro ha Distro : BB – Bod pe boued e brezhoneg 10 000€

Ha ma sikourfe ar rouedadoù sokial ar vrezhonegerien da gejañ da vat o vout degemeret, bod pe boued, e brezhoneg ?
Gellet a raint touristañ en o bro ha pelloc’h, gwelet abadennoù pell diouzh o zi, foetañ bro evit o labour…, hep dilezel o yezh da-geñver ar predoù pe an nozioù. Skoulmañ darempredoù eus an dibab a raint ivez ha kreñvaat kumuniezh ar yezhourien. Tud o teskiñ ar yezh a c’hello dibab bout soubet enni ouzhpenn o c’hentelioù.
A-benn nebeut e vo kavet titouroù war www.bev.bzh