Santez Peronell (heul)

E chantele ar chapel e c’heller lenn e brezhoneg un nebeut titouroù all, skrivet n’eus ket pell :

<em>«Amañ e vevas Santez Perounel, gwerc’hez santel, hec’h-unan-penn, ha tost ouzh ar familhoù. </em><em>Soursial a rae outo, he spered troet war-zu an Neñv. He flijadur ‘oa ober war-dro ar vugale, he brud a redas kement ma teue an dud a bell da c’houlenn diganti kuzul ha sikour. Un dudi ‘oa gwelout anezhi o pareañ ar vugale. Anaout a rae ar plant, met pareourez ‘oa, dreist-holl abalamour d’he feiz e madelezh Doue, ur feiz ken anat ha ken sklaer eget dour ar feunteun, ‘lec’h ma skuilhe Perounel kement a garantez.»</em>

E 2015 e oa bet roet lañs d’ur pardon e Kervern-an-aod <strong>Dirinonn</strong> : eno he vije en em gavet dre vor, e traoñ lenn-vor Brest eta, o tont diouzh Iwerzhon. Evit gwir n’anavezer netra war ar santez-mañ, a zo bet erlerc’hiet gant Sainte Pétronille, a oa gwechall patromez rouantelezh Frañs, ur werc’hez eus ar c’hentañ kantved bet merzheriet e Roma, hag a oa bet pareet ha badezet gant Sant Pêr e-unan, ha deuet da heul da vezañ evel e verc’h speredel : diwar anv Pêr e teu hec’h anv eta, ha Perrine, Pierrette, met ivez Peronelle, ur ger a veze roet e galleg d’ar merc’hed sod ha teodek !

Setu ar pezh a lavar ar c’hantik bet savet nevez ‘zo, war don I.V.. Ar Porzhoù :

Diskan : Santez Peronell venniget

Pedit Doue evidomp

hag eus palez kaer an Dreinded

digorit frank an nor deomp !

1. Er bedenn c’hwi ho peus bevet,

ho kalon tost d’hor Salver,

goulennit ma vo hor spered

leun a beoc’h ha dibreder.

2. Labouret ho peus da c’hounid

bara ‘vidoc’h hag ar paour,

deskit deomp bevañ hol labour

‘vel un doare da bediñ.

3. Ho feunteun ‘oa evidoc’h,

sin kaer karantez Doue ;

grit ma raimp an hent ganeoc’h,

betek feunteun hon ene.

4. Klasket ‘peus dremm hor Salver,

ho kalon ‘oa da Zoue ;

bevet ‘peus ‘vel an dud dister,

gant karantez ‘n hoc’h ene.

5. Roet ‘peus d’an dud hoc’h amzer,

douget ‘peus o fedennoù,

‘vit o c’has betek hor Salver

ha kaout perzh ‘n e vennozhioù.