Dielloù ar rann : Brezhoneg en Iliz

Brezhonegeniliz : renabl an oferennoù brezhonek, katekizerezh, aozadur ur Bibl anavezet gant Roma (war ober), embannadurioù arbennik, pirc’hirindedoù…

Beilhadeg-pediñ e Naoned

Embannet da gant

Beilhadeg-pediñ e brezhoneg
er Chapel Maria krouet Dinamm

d’ar Yaou 14 a viz Mezheven da 7 eur noz

straed Malherbe, Naoned (a-dreñv an Iliz Veur

Laouen e vefemp da welout ac’hanoc’h en hon touez.

Follennoù divyezhek war al lec’h.
Pedennoù da zeskiñ war feiz-ha-breizh.blogspot.fr

Kasit keloù d’ho mignoned mar plij !

 

Mizvezh ar brezhoneg : Chapeled d’ar Yaou 12 a viz Ebrel en Naoned

Embannet da gant

E chapel an Itron Vaia ganet Dinamm en Naoned, ur chapel bet savet gant Duged Breizh an hini e vo graet ur chapeled eus ar misterioù laouen e brezhoneg.

Chapel an Itron Varia ganet Dinamm,

straed Malherbes, en Naoned,

d’ar Yaou 12 a viz Ebrel da 6 eur hanter abardaez

ha d’ar Sadorn 28 a viz Ebrel da 8 eur 30 abardaez.

Padout a raio tri c’hard eur bennak. Goude e vo tu da gemer ur banne tomm e-kichen.

“E-lec’h ma-z eus daou pe dri bodet em anv emaon en o zouez” eme Jezuz.

Aozet eo gant http://feiz-ha-breizh.blogspot.fr/2018/04/beilhadegou-pedin-e-brezhoneg-e-naoned.html

 

Renta-kont Famille Chrétienne war pastorelezh ar brezhoneg en eskopti Gwened.

Embannet da gant

Amañ da heul div bajennad tennet eus ar gelaouenn “Famille Chrétienne” eus ar sizhun-mañ (sizhunieg, 60.000 koumanant) diwar benn ar bastorelezh e brezhoneg en eskopti Gwened.

Da notiñ ne chom ket e rez ar folklor : anv ‘zo ivez a bolitikerezh, eus gwirioù Breizh, ha n’eo ket tamm ebet politikerezh evit brudañ ar c’hastaouerezh e brezhoneg evel ma ra “Mignoned ar Brezhoneg” en o gouel sañset “broadel” eus ar brezhoneg (er pleustr digor hepken d’an dud a-du gant o menozioù mezhus arloupet ha politically correct…)

Da notiñ ivez ez eo merket n’eo ket chalet an eskibien all gant al liamm-se ez eus da blediñ gantañ, etre ar feiz hag ar yezh hag ar sevenadur.

 

file0828
file0827

Diñsoù an Azvent gant Ar Gedour ha Clos.bzh

Embannet da gant

 

Azvent-Nadoz Vor

Bevañ amzer an Azvent en ur c’hoari diñsoù : ur c’hoari e brezhoneg.

Gant 4 diñs e vezo moaien deoc’h bevañ marevezh an Azvent e brezhoneg gant ho pugale. Dudi ha speredelezh : un diñs bep sizhun, unan evit ober strivoù hag oberoù mat a-benn gwellaat e demz-spered hag e emzalc’h, an eil evit pediñ, an trede evit ober oberoù mat d’an dud-nes ha diavaez an tiegezh. An diñs diwezhañ evit sevel kraoù an Nedeleg tamm-ha-tamm. Ur c’hoariell mat evit ar familhoù, ar c’hatekiz, ar skolioù hag all. Steudad vihan, diñsoù e koad 4cm x 4cm. 20 €

E gwerzh e stal Nadoz-Vor Brest.

https://www.argedour.bzh/de-lavent-disponibles-breton/

 

Karnel Penn-ar-C’hrann

Embannet da gant

Un tammig enklask am eus graet war derou un enskrivadur brezhonek hir a-walc’h am boa damlennet e deroù miz Du, a-us da zor chapel bered Penn-ar-C’hrann, o vont er-maez eus an Oferenn zivyezhek a vez en iliz-parrez-se, kaer-meurbet, bep sul kentañ ar mizioù ampar.

E niverenn brizius eus Gwalarn, 144-145 1942 a ro disoc’h un enklask war an enskrivadurioù brezhonek e Breizh-izel. Ne gavis roud ebet. Dre internet e kavis, avat, ha setu-eñ, deiziadet eus 1594 :

CHAPELL DA SA(NT) ITROP/ HA KARNEL DAR LAK(A)T ESQ(E)RN AN POPL.

Da lavarout eo «Chapel da sant Eutrop, ha karnel da lakaat eskern ar Bobl».

Enoret bras e oa bet Sant Eutrop er pemzekvet kantved dre ma oa deuet a-benn Aotrou Rozampoull e Plougonven da gaout ur «vulenn» kant devezh induljañs digant ar Pab evit e chapel Sant Eutrop… Neuze e kaver roud eus ar sant e Penmarc’h, Lokorn, Bodmeur, Roznoen, ha neuze Penn-ar-C’hrann, daoust ma voet tennet kuit buan eus Goueler eskopti Kemper dre ma oa ur «sant estren».

Perak e voe gouestlet da Sant Itrop pe Eutrop ? Marteze ez eus aze ul liamm gant irienn ar Brotestaned e Frañs rak gwreg Aotrou Rozampoull a oa eus Kêr Saintes e lec’h e oa bet eñ gouarnour, ur gêr m’emañ enni iliz-veur Sant Eutrop, a zo bet difennet start gant ar gristenien chomet feal d’ar Pab, just a-walc’h. Ar gehelerezh da Sant eutrop a vefe bet, evit Aotrou Penn-Ar-C’hrann un doare da enebiñ ouzh an disivouderien brotestant. Pevar bloaz goude savedigezh ar chapel, e voe Skrid An Naoned gant ar roue Henry IV, e 1598.

Piv a savas ar chapel-se ? D’ar poent-hont, Aotrou kastell «Le Chef du Bois», «Penn-ar-C’hrann» a oa an Aotrou Kêrsulguen a Gêrlozreg. Bez edo e montroù Parrez Plouziri e 1534. Yec’hann, bet ganet war-dro 1558 a voe moarvat an hini a lakaas ar chapel da sevel. Pennhêrez Penn-ar-C’hrann a zimezas gant Frañsez Ar Gonideg a Gêrbizien1. Karc’hariet e voe e Karaez e-pad an Dispac’h, hag he c’hoar vihan, an Itron a Lezgwern a hêrezas.
Tra rouez-tre e Frañs, ez eo chomet perc’henniezh ar chapel da aotrou ar barrez, ha n’emañ c’hoazh evit bremañ na d’ar gomun, na d’ar barrez, met da berc’henned ar c’hastell.

N’eus ket kalz a enskrivadurioù kozh e yezh ar bobl e ilizoù Breizh-izel. Un dra a zo heverk eo e vezont kavet stankoc’h e tolead Landerne : e Trelaouenan, er Merzher-Salaün, war chapel Sant Drien Plougastell hag e Penn-ar-C’hrann eta. Me ‘laka an dra-se war gont ar binvidigezh a oa er vro a-drugarez d’al lin, etre daouarn un nebeud tiegezhioù diwar ar maez, anvet ar “Juloded”, o deveze ouzhpenn-se nebeut a vugale, hag a zimeze etrezo. Se en deus devoudet war ur rummad a vrezhonegerien en o aes n’o doa ket dilezet ar yezh evit kelou-se p’o deus dalc’het da chom war ar maez, e-lec’h e chomas ar brezhoneg roue war an dachenn betek ar Brezel bras.

T. G.

1Hevelep tiegezh, met a bell-tre hag hor yezhadurour meur, a oa eus ar skourr Ar Gonideg a Gêrdaniel.

 

Pedenn evit ar vuhez

Embannet da gant

O Mari, gouloù-deiz ar bed nevez,

Mamm ar re vev, gouestlañ a reomp deoc’h kaoz ar vuhez :

O Mamm,

Sellit ouzh an niver divent a vugale

na lezer ket anezho donet er bed.

Sellit ouzh ar baourien o deus diaezamantoù da vevañ.

Sellit ouzh an dud a c’houzañv, gwasket gant taerded garv.

Sellit ouzh ar re gozh hag ar re glañv lazhet dre zigasted, pe gant truez lorbus.

Ra vezo gouest ar re a gred en ho Mab da embann uhel Aviel ar vuhez

d’an dud a-vremañ, gant karantez ha gwirionez.

Roit dezho ar c’hras d’e zegemer evel un donezon bepred nevez.

Roit dezho al levenez d’e lidañ gant grad-vat a-hed o buhez,

roit dezho ar galon evit reiñ testeni anezhañ gant nerzh-kalon,

‘vit ma vo savet gant an holl dud a volontez vat sevenadur ar garantez hag ar wirionez,

evit meuleudi ha gloar an Doue Krouer a gar ar vuhez.

Pedenn tennet eus lizher-meur an Tad santel Yann-Baol II : Evangelium vitæ
 bet troet gant Uisant ar Rouz evit AR GEDOUR